sætur og sællegur

Vá hvað hann er flottur svona sólbrúnn. Bara að það kæmi eitthvað að viti upp úr honum þá væri lífið fullkomið. En það er borin von.

Er ekki komin tími til að fara brýna heykvíslarnar og fleiri garðverkfæri. Það eru takmörk fyrir því sem hægt er að þola af bulli. 

Samfylkingin er svo upptekin af því að líta út sem þokkaleg bráð fyrir ESB að þau mega ekki vera að því að pæla í þrautpíndum íslenskum almenningi. 

VG er upptekin við að banna og banna að banna bara eitthvað að þeir vita ekki að það er bannað að banna einhverju að ( Vá komin út í tóma steypu en það skýrist af því að ég er að skrifa um VG.) 

Ögmundur vildi Liljurnar kveðið hafa. Æ sorry ég er bara komin með upp í kok af þessu andskotans liði. 

Sjálfstæðisflokkurinn. uhu ég veit ekki og þeir vita heldur ekki í hvorn styrktarfótinn er best að stíga í neinum málum.

Framsókn hmmm er sá flokkur enn til. Er nema von að maður spyrji eru þetta ekki að flokksbrot dreif um allar jarðir ( um allar jarðir smá sveitarómantík) 

Hreyfingin já eru þau ekki að standa sig ig hig ( shit er að missa mig í tóma vitleysu) 

Góðar stundir

Dómurinn skapar ekki peninga

Athugasemdir

[Ævar Rafn Kjartansson, 23.6.2010 kl. 01:41]

Fékk þetta sent:

Trúnaðarmál.
Ég sendi þennan póst á ákveðið fólk sem ég hef kynnst á mismunandi hátt en á það allt sameiginlegt að hafa sýnt það að vera með réttlætiskennd. Sum ykkar hef ég aldrei hitt. Önnur þekki ég betur og sum get ég kallað vini og kunningja.

Sum ykkar hafa haldið uppi baráttu gegn því gengdarlausa ofbeldi og óréttlæti sem heimili landsins og einstaklingar hafa verið beitt í kjölfar afleiðinga verka örfárra manna og aðgerðarleysis stjórnvalda.

Í Búsáhaldabyltingunni tókst að bægja græðgisvæðingunni frá tímabundið.
Hugarfarsbreyting, iðrun og siðbót stjórnmálaflokkanna, bankanna og annarra ábyrgra fyrir hruninu hefur staðið á sér.

Mótmæli virka tannlaus og atvinnulausir virðast hafa sætt sig við örlög sín.
Ríkisstjórnin segist hafa boðið yfir 50 úrræði til hjálpar heimilum landsins. Þessi úrræði eru flest í höndum banka sem greiða starfsmönnum sínum bónusa fyrir góðar innheimtur.
Félagsmálaráðherra boðar úrræði vegna ólöglegra gengistryggðra lána sem virðast betur sniðin að fjármögnunarfyrirtækjunum en neytendum.
Það er enn hugarfar ráðamanna að bankakerfinu þurfi að bjarga á kostnað venjulegra Íslendinga, misþjáðra af skuldsetningu en þjáðra. Skattahækkanir ríkisstjórnar og hækkanir á vín, tóbak og bensín hafa engu skilað í ríkissjóð. En þessar hækkanir hafa hækkað húsnæðislán okkar og skuldir. Hugsanlega til að gera eignaraðild erlendra vogunarsjóða að gjaldþrota bönkum meira spennandi.

Það er nóg komið. Fjórflokkurinn telur sig hafa fengið gula spjaldið í borgarstjórnarkosningunum. Þeir fengu rauða spjaldið og það er kominn tími til að breyta því sem hægt er að breyta.

Ég er hér að varpa fram hugmynd. Það kann vel að vera að þú viljir ekki taka þátt en ef þú ert til í hana er hugmyndin að þú reynir að virkja líka alla nákomna þér í hana.

Her hefur aldrei verið jákvæð hugmynd á okkar landi. En nú er nauðsyn. Við þurfum her. Her manns sem berst gegn því ranglæti sem yfir okkur er hellt.

Hvernig ætti sá her að vera?
Ég ætla hér að varpa fram mínum hugmyndum og hugmyndum um aðgerðir hans en þetta verður aldrei gerlegt nema stór hópur fólks komi að þessu. Með lýðræði og réttlætiskennd að leiðarljósi.

Hvíti herinn:
Eins og allir herir þurfum við einkennisbúning. Mín tillaga er sú að búningur hvíta hersins sé einnota málningargalli með hettu, rykgríma, hvítir hanskar og svart skótau. Gallinn er ódýr . En af hverju þennan galla? Þú getur dregið hettuna yfir höfuð þér. Gríman hylur rest. Við viljum jú ekki persónugera þá sem hlut eiga að máli. Ástæður þessa búnings eru einfaldlega þær að í sumum aðgerðum okkar viljum við ekki þekkjast á eftirlitsmyndavélum þannig að hægt verði að greina sundur gerendur og þá sem tóku þátt en brutu engin lög. Sbr. það sem ég kem að seinna með að skvetta blóði eða málningu.

Tillögur mínar að byrjun á mótmælum: (Tek fram að það yrði í höndum endanlegrar stjórnar Hvíta hersins hvað yrði gert).
Mínar hugmyndir eru þær að ekkert verði gert án meirihlutasamþykkis.
Ekkert verði gert án 20 þátttakenda+.
Ekkert verði gert án upptökuliðs og ljósmyndara fyrir facebook og heimasíðu.
Ekkert verði gert sem felur í sér ofbeldi.

Aðgerðir hvíta hersins:

A. Alþingi:
1. Þrífa spillinguna burt. Mætt með fötur, kústa og þvottaefni sem við erum búin að merkja sem spillingareyði, mútuleysi, hagsmunasápu ofl. og þrífum húsið.

2. Þögul mótmæli á palla Alþingis í búning. 20 mín í þögn og þingmönnum gefið rauða spjaldið.

Ég er ma. með þá hugmynd að smíða hengingargálga með 4 mismunandi löngum ólum eftir því hvaða greiðsluúrræði þú velur. Gapastokk fyrir útrásarvíkinga og jafnvel fallexi fyrir þá sem ekki vilja úrræði ríkisstjórnarinnar. Þessi tæki fylgdu öllum mótmælum.

B. Bankar:
1. Aðgerðin felst í því að herinn mætir í bankann og tekur númer. Hugsanlega með klink heimilisins í talningu. Þegar allir eru búnir að taka númer byrjar sá fyrsti aftur að taka númer. Heill dagur af þessu og þó að ekkert sé gert til að koma í veg fyrir að viðskiptavinir aðrir taki númer og fái afgreiðslu kemur þetta til með að draga úr afköstum bankans um 80-90% þann daginn.

2. Herinn mætir fyrir utan valinn banka með dreifibréf sem stiklar á stóru um misferli þess banka og dreifir til viðskiptavina hans. Gapastokkur ofl. yrðu á svæðinu.

3. Í mótmælunum á Thailandi lét fólk taka sér blóð og ataði opinberar byggingar og mótmælastaði með. Viljum við ata þær stofnanir blóði sem eru að blóðmjólka okkur? Við þurfum ekki að ganga eins langt og í Thailandi það er hægt að kaupa td. blóð af sláturhúsum. Við getum líka notað málningu.
Þessi aðgerð orsakar handtökur og yfirheyrslu. Hugmynd mín er að td. þriðji hver maður skvetti blóði, hinir vatni. Þar sem þú þekkir ekki hina í hópnum og engin leið að finna útfrá öryggismyndavélum þá seku hefur Lögreglan ekki mál í höndunum. Við lítum jú öll eins út!

C. Fjármögnunarfyrirtæki.
1. Sömu aðgerðir og gagnvart bönkunum.

2. Dreifimiði með upplýsingum um hvaða brot fjármögnunarfyrirtækin hafa framið við útreikninga og viðskipti sín dreift fyrir utan fyrirtækin.

D. Verkalýðshreyfingin - Lífeyrissjóðirnir.
1. Hvar hefur verkalýðshreyfingin haldið sig sl. tæp 2 ár? Hún hefur svikið félagsmenn sína og sýnt okkur að hagsmunir þeirra, lífeyrissjóðanna og útrásarvíkinganna ganga framar félagsmönnum. Heimtum hreinsun á þessum meðreiðarklúbbum hrunmeistaranna. Mótmælum fyrir framan hallir verkalýðsfélagaeigendanna.

E. Ráðuneytin
1. Félagsmálaráðuneytið.
Árni segðu af þér, þú ert ónytjungur - sem yfirskrift. Yngvi Örn Kristinsson sem þú réðst til að takast á við greiðslu- og skuldavanda heimilanna er með 230 milljóna króna launakröfu í þrotabú Landsbankans. Hvernig á hann að vera fær um að greina vanda „venjulegra“ Íslendinga? Þar að auki hefur hann starfað við ráðgjöf hjá Alþjóða gjaldeyrissjóðnum. Okkur er ekki skemmt.

2. Dómsmálaráðuneytið.
Gjafasóknir á bankanna og ríkið fyrir alla sem orðið hafa fyrir barðinu á þeim. Bankarnir felldu landið með aðgerðum sínum.  Verðtryggingin og aðgerðir Seðlabankans eru hugsanlega mannréttindabrot. Það er skýlaus krafa að allir Íslendingar burtséð frá fjárhag geti leitað réttar síns fyrir dómstólum.

F. Útrásarvíkingarnir
1. Af hverju er einnar krónu samkeppni á Íslandi?  Í verðkönnunum ASÍ á 45 vörutegundum voru 19 með 1 krónu verðmun þe. krónu ódýrari í Bónus en Krónunni. Er þetta eðlileg samkeppni eða þegjandi samkomulag um að rugga ekki bátnum?  Pálmi Haraldsson nánast einokar innflutning grænmetis til landsins. Mótmælum fyrir utan fyrirtæki þessarra manna og hvetjum til viðskiptabanns á fyrirtækin.

2. Leppar útrásarvíkinganna.  Það eru allar líkur á að Björgúlfur Thor Björgálfsson eigi enn miðbæ Reykjavíkur í gegnum leppa sína. Þarna hef ég ekki sannanir er það er athyglisvert að einn þeirra sem virðast eiga mikið af  því húsnæði sem er að grotna niður í miðbænum er bróðir fjölmiðlafulltrúa hans.

Þau mótmæli sem hafa verið í gangi hafa verið of bitlaus og jafnvel ekki beinst á rétta staði. Með aðgerðum Hvíta hersins finna stofnanir og bankar fyrir okkur. Reynt verður að gera sem minnst af því að láta lögregluna ganga á takmarkaðann eftirvinnukvóta og haft samráð að eins miklu leiti og hægt er. Samt munum við halda okkur á jaðri lögmætis borgaralegrar óhlýðni.

Ég er hér bara að stikla á stóru um hugsanleg mótmæli og því hversu rotið okkar samfélag er orðið. Við gætum líka velt fyrir okkur jarðakaupum auðmanna. Vatnalögunum. Því að Geir H. Haarde ábyrgðist 530 milljarða sem 2% innistæðueigenda í bönkunum áttu. Hverjir eru þeir td?  Alþjóða gjaldeyrissjóðnum. Það er af nægu að taka.

Höfum það í huga að með samstöðu getum við:
Fellt banka.
Fellt ríkisstjórnir.
Komið á eðlilegu viðskiptasiðferði.
Komið á réttlæti!
Komið í veg fyrir útburð fjölskyldna og ánauð til lífstíðar.

Við viljum ekki bjóða börnunum okkar upp á þá framtíð sem hefur verið mótuð af glæpamönnum og vanhæfum stjórnmálamönnum.  Við viljum aðgerðir fyrir fólk ekki fjármagn.

Til að Hvíti herinn verði að veruleika þarf stóran hóp fólks.  Það þarf að ákveða hvar mörkin liggja í aðgerðum. Það þarf að skipuleggja og fylgja eftir. Það þarf talsmann. Fundarstjóra. Ljósmyndara og kvikmyndatökumenn. Vefsíðu. Hópstjóra. Innra skipulag. Aðgerðaáætlun. Hermenn. Samskiptareglur.  Samkomustað. Stjórn. Og svo margt fleira. Það þarf að vera hægt að mótmæla á vinnutíma. Til þess þarf að virkja atvinnulausa líka.  Þó að við höfum mismikinn tíma og metnað þarf að vera hægt að halda aðgerðum úti alla daga vikunnar.

Ég sem er að skrifa þetta er ein manneskja. En með samskonar  réttlætiskennd og þið sem ég er að senda þetta. Ég get stundum mótmælt, stundum mætt og tekið ákvarðanir um aðgerðir. Stundum ekki verið með. Það er vegna þess að þá hef ég einhverja pínulitla atvinnu. Ég er enginn ræðumaður. Eða fundarstjóri, hvað þá leiðtogi. En ég get tekið þátt og fengið fólk til að taka þátt. Það getið þið líka.  Sum ykkar hafa það sem þarf til að gera þetta að veruleika. Að stofna baráttuhóp fyrir réttlæti á Íslandi. Að stýra framkvæmdinni að þessari hugmynd.

Þau ykkar sem styðja þessa hugmynd og vilja vinna að henni  sendið mér póst á [e-mail] Hittumst og ráðum ráðum okkar. Áframsendið á alla sem þið teljið að vilji knýja fram réttlæti á Íslandi.

Ég sendi þetta nafnlaust enda er hvorki hugmyndin að ég eða neinn annar verði persónugervingur hvítahersins. Það er heildin sem mun skipta máli. Gerum Ísland að samfélagi fólks með mannréttindi og réttlæti að leiðarljósi, ekki þrælakistu  fjármagnseigenda! 

[Óskar G (IP-tala skráð) 23.6.2010 kl. 17:19]

Til að mótmæla þarf eiinhver að vera að hlusta!

Veit einhver t.d. hvar Jóhanna er???

[Sigurður Sigurðsson, 23.6.2010 kl. 20:54]

Hver er þessi Jóhanna. Rámar í einhverja gráhærða eldri konu sem var í pólitík. Ertu að meina hana Óskar.

Ofsalega löng athugasemd hjá þér Ævar en ég fæ mér pop og kók og renni í gegnum hana.